| ～踩到鞋底甩埋～ 搞唔成船河，頗失望啦，不過都唔緊要，留待下年暑假時再搞多次，
始終９月搞，雖然天氣仍熱，感覺上暑假已經完左，再去船河亦無咩
意思咁，加上今年自己朋友不太多人參與，令到想搞既心都唔同左。 算啦，寄望下年再搞多次。 無船河去，唯有自己搵節目啦，無所事事，既可燒脂，又唔洗特登搵
人陪踩單車最好不過既活動，拎起基本需要就可以起行，快靚正。 今日天氣非常好，好曬好熱，但就無７－８月咁熱，或者因為濕度較
低，乾爽得多，唔錯的感覺，汗也流得相對地少，好舒服，要再繼續
努力。今次訂左目標要在３小時內來回馬鞍山至大尾篤，可惜達不到
目標，比目標多出半小時，最後用左３．５小時才完成大約４０公里
的路，總算ＯＫ既，若中途不是甩鞋底，或者會達標呢。今日踩得非
常累，中途很少停下來休息，不斷地踩，不斷地踩向內心所訂的休息
點飲水。 返家後磅重，嘩～少左兩磅呀，繼續努力。 好搞笑，踩踩下發覺鞋底唔多對路，細看之下，原來甩左底，踩到唔
暢快添，後來諗到方法暫時穩住鞋底，唔好甩下甩下，好樣衰，將帽
既繩扎住佢，唔好比佢甩，撐到返馬鞍山再算，好彩呢個方面唔錯，
起碼撐到返馬鞍山再返家。 ↓踩到鞋底有八成甩左，吊住幾唔舒服↓ ↓煩到死，用繩扎佢先，踩到返馬鞍山再算↓ ↓大尾篤風和日麗↓ ↓踩唔切返馬鞍山那邊影日落，唯有係吐露港影住先啦↓ ↓陪左我半日既單車↓ 踩完後，帶著非常疲累既身軀返家。 今日又係黃大仙廟會開始的第一天，整天都有許多不同的活動，食完
飯無所事事，都陪左老媽子落去逛逛，睇下有咩睇，原來有大戲做，
唔怪得咁多「亞嬸」落去睇野啦。我地有幸睇到最後一套劇目，由蓋
明暉做，今次都係第一次睇佢做大戲，多數都係睇佢時裝劇多，例如
《畢打街》內的黑幫大家姐等．．．哈～感覺幾新鮮。 ↓整個廟會，幾有氣勢呢。↓ ↓蓋明暉呀↓
燒完脂非常疲累的馬立花
|
| |
| ～潮州月餅～ 原來家陣既潮州月餅，價錢比起美心更加貴呢，估唔到呀～～兩個潮州芋泥
月餅，要成＄９６，一盒四個的話，起碼要＄２００，犀利呀。唔好理，仍
有它的市場價值，依然係排隊逐個去買。不過的確係好香既，佢新鮮出爐，
出到舖面時，仍感覺到那份餘溫，幾溫暖的感覺，或者便是它的價值吧。 至於味道，暫時未試，要等老媽子話得先食得，睇來都要多等三五天時間。 今晚去左睇ＭＦＣ友賽，感覺真係唔錯，好有聚舊Ｆｅｅｌ呀，哈～之後同
班隊友去食飯，有說有笑，唔錯，希望來緊日子多點出席佢地比賽支持下。 今日係個特別日子，幸好你仍然記得，唔洗我提你，哈～ 食左好多野怕跑唔郁既馬立花 |
| |
| ～甲組聯賽～ 無聊熱士辣辣既週末，百無了賴地又走去踩單車，輕量級既，踩左短短
兩粒鐘就算啦，有郁總好過無郁啦，良心都好過些少。 適逢沙田有甲組足球聯賽睇，沙田主場戰愉園，反正得閒，加上又有免
費飛（多謝ＪＯＬＬＹ），入場感受下香港睇波氣氛都唔錯，香港球迷
一向都好齊心＝＝＞去鬧去小。搞笑的是，每當有波明明ＯＫ既，但球
員接唔到或失左機會，球迷們都好齊心地「小」，哈哈～同埋我身後數
行有個亞姐級人馬，不斷地講波，不斷地講兩隊形勢，好搞笑！！間中
感受下呢類氣氛當發洩下幾唔錯呢，人人都變身成講波佬，邊條友掂，
邊條友要小，之後人人又會變成領隊咁，猛話換人，好正！下次如果再
有，不妨再入場睇下。 今場令我想入場原因係有沙田門將範俊業，幾鐘意呢位近年本地聯賽港
腳，感覺幾穩陣，雖然尋日有點失手，但無阻我支持佢呢。 ↓沙田運動場↓ ↓比我想像中多球迷入場睇呢↓ ↓張飛比我搞到咁樣↓ 同埋呢，久違了的冰菠蘿，又可以係沙田運動場內買得返食呀，價錢又
唔係貴，一件＄３，大熱天時食舊咁冰既菠蘿超正呀！！消暑良品。記
得以前有得食冰菠蘿，已要數回以前有跑道時既旺角運動場啦，小學時
的運動會在那裡進行，以些少錢就買到來食，童年感覺又重拾回來呢。 真係好正！！ 回味冰菠蘿的馬立花 |
| |
| ～爛面～ 死火，唔知係咪年紀真係大左，皮膚相對地都差左，搞到連鏡都唔敢照
，今年跟往年比較，尤其是下半年，已經差左好多好多好多好多，這都
嚇了美容師一跳，見佢花左好多心機幫我，實在感激，看來不可以亂食
野，多點做保養皮膚，早睡早起，要多做運動，重整返身體的內分泌才
可令到皮膚重獲新生。再不能以為自己十八廿二之年，亂來囉。 美容姐姐問我近日是否有壓力，因為從她所見，我那些不是皮膚不淨而
起的瘡，估計是心理上壓力而令到內分泌失調所致。的確說得沒錯，壓
力是無形的，眼見我工作上像平步青雲，沒什麼大起大跌，但事實是假
的，生意不好，老細自己面色不會好，生意不好，收入自然也不會好，
生意不好，飯碗也許不保；加上又想儲多點錢，不斷在想著如何開源，
如何節源，從日常生活中各項事地慳，說實在，很辛苦，要將我由過往
大花筒的生活轉過來，變成平淡，將大多數的娛樂，例如同朋友食飯，
睇演唱會，買衫買濕碎野，通通都要想過才花，幸好總算有一點點成績
，否則人都癲啦。 原來每星期定額零用錢在＄５００，實在唔易。究竟有什麼辦法呢？ 今日聽到好多好多野，遠遠比我所知的，原來只是表面一層，深層中的
故事，亦即事實的底蘊，非常恐怖，聽到都令我心寒一寒，心亦很痛，
一個人童年成長階段，若有任何走歪了路，要回頭，非易事，家人的支
持，家庭的溫暖也可以令到走回善路，上一代做得不好，間接地令到這
一代走上一條歪路，未知下一代會否也隨著哪條路走呢？ 心真的很痛．．． 祈求上天幫助這小女孩走回善路，重拾她兒時可愛的笑容，重拾她兒時
天真活潑，或者我有什麼可以幫得著她呢？請給我指示。 願上天能夠幫助她的馬立花 |
| |
| ～愛上ＭＲ．～ 數數手指，曾經有段時間幾愛好聽本地樂隊既歌，但已經係ＸＸ年前
ＢＥＹＯＮＤ既事啦。近日機緣巧合之下，聽到收音機播上ＭＲ．既
《如果我是陳奕迅》，依依．．．好聽喎，主音Ａｌａｎ把聲的確幾
似陳奕迅，所以之前既星光ｘｘ耀保良，佢地Ｊａｍ左幾首歌超好睇
。除左《如》呢首歌外，我發覺佢地好多歌都好好聽，呢首《搖擺》
相信係我近日超鐘意既歌之一，如果閒時在家，不妨用來校大聲去聽
ｒｏｃｋ下, 真係唔錯呢。 另外我覺得佢地既歌，深得我心既原因為，佢地以非情歌為主，正呀
！！近年太多太多情歌，簡直係泛濫得恐怖，好似人生就只有愛情般
，沒有其他可以專注，情可以分好多種，非單單愛情最為重要吧。同
埋近年太多太多為愛情而死既歌，太灰啦，人生總有許多的希望呢。 我已經急不及待買了他們最新碟《ＩＦ Ｉ ＡＭ》，其實只用少少
錢，就可以當作支持本地創作樂隊，沒有人支持，香港又入怎去培養
好既音樂人呢，沒有好的音樂人，我們就沒有好歌聽，是歌迷的損失
呢，大家多多支持本地樂隊呀。 佢有幾首唔錯，分別係《森林》、《想太多》、《感激》、《搖擺》 《如果我是陳奕迅》 去片．．．欣賞下啦。 《森林》 《如果我是陳奕迅》 《搖擺》
瘋狂迷上聽ＭＲ好歌的馬立花
|
| |
